Ég heiti Ylfa Mist Helgadóttir og ég er öskutunnumatur....

Svona gæti ég heilsað. Mér líður eins og einhverju sem kasta má í ruslið! Ónýtt, úr sér gengið drasl sem virkaði hvort eð er aldrei almennilega.

Hef verið í því að falla í öngvit að hætti fagurra aðalsmeyja síðastliðna daga, -eða meira svona: skella í gólfið eins og fullur hani! Endaði auðvitað á Fjórðungssjúkrahúsinu á Ísafirði sem er að verða meira sótt af mér en mitt eigið salerni. Svei mér þá! Einhverjar pumputruflanir valda yfirliðunum, pumputruflanir sem eru reyndar ekki svo nýjar fyrir mér, en urðu fyrst raunverulegar opinberlega við það að ég væri skyndilega í svona náinni snertingu við eldhúsgólfið í vinnunni......

Það furðulega er, að ég, sem vissulega er í "rausnarlegri kjörþyngd," svo ekki sé meira sagt, hef engin einkenni offitu. Ekki með háan blóðsykur, ekki með hátt kólesteról, ekki með háan blóðþrýsting..... semsagt; það er ekkert að mér. Ég stend bara ekki reglulega vel upprétt af og til! :)

En nú á að rannsaka gömlu fyrir og í bak svo að hægt verði að kippa mér í lag sem fyrst. Enda hef ég ekki þolinmæði í mikla bið. Ég er í veikindafríi um helgina, enda nýkomin heim, og ætla að gera ekki neitt. Ekkert. Nema kannski læra aðeins heima........

andfélagslegur íþróttapistill

Þar sem ég er sérlega lítið gefin fyrir íþróttir og hreyfi mig helst ekki nema til að ná mér í eitthvað að borða, (berjamó, sveppatínsla, fjallagrasasöfnun, göngur og réttir, labba í búðina o.þ.h.) hef ég að sama skapi akkúrat engan áhuga á að horfa á aðra stunda sínar íþróttir. Mér finnst hundleiðinlegt að hlaupa á eftir einhverri tuðru og enn leiðinlegra að horfa á aðra gera það. Hvað þá að glápa á langhlaup eða golf! Eina hreyfingin sem mér þykir í raun skemmtileg er að ganga í fallegu umhverfi. Helst með tíkina mína og jafnvel aðra fjölskyldumeðlimi. En ég myndi líklega ekki endast lengi yfir því sem sjónvarpsefni, að horfa á einhvern annan viðra hundinn sinn í hálftíma-klukkutíma.....

Að þessu sögðu þá ætti fólk að skilja gremju mína yfir því þegar heilu og hálfu sjónvarpsvikurnar eru undirlagðar íþróttaviðburðum. Það er heimsmeistara-þetta og heimsmeistara-hitt. Allt jafn grútleiðinlegt. Ólympíuleikarnir mættu vera á áttatíu ára fresti for all I care og ég myndi hlusta róleg og sátt á útvarpið ef öskrandi íþróttafréttamenn létu það vera að minna á einhverja leiki sem gætu mín vegna farið fram á tuglinu!

En ég gladdist með “strákunum okkar” eftir leikinn á móti Spánverjum, jú, hann fór ekki framhjá mér. Ekki einu sinni MÉR! Og ég gleðst með þeim að hafa náð þessum glæsilega árangri. Mikil ósköp. En ég tek þessum sigri ekkert sem einhverju persónulegu afreki af minni eigin hálfu. Ég er ekkert merkilegri Íslendingur í dag en ég var áður en Ólympíusilfrið varð þeirra.

Eitt þykir mér þó dálítið sérstakt. Vissulega er sjálfsagt að gleðjast með drengjunum, ekki misskilja mig. Það er bara alls engin nýlunda að Íslendingar raki saman verðlaunum á Ólympíuleikunum. Það er ekki langt síðan að gullverðlaunin sliguðu Íslenskt afreksfólk, án þess að fjölmiðlamenn færu hamförum, fálkaorðum væri dreift hægri vinstri, og stórhátíðarhöld væru skipulögð af hinu opinbera. Og ég endurtek: ég er ekkert að draga úr afrekum “strákanna okkar,” ég er eignungis að benda á afrek sem voru unnin við….tjah… ögn minni geðshræringu okkar.

Þannig að við verðum að spyrja okkur: skipta afrek fatlaðra íþróttamanna á Ólympíuleikum fatlaðra ekki alveg jafn miklu? Erum við að tala um eitthvað minni afrek? Og ef svo er? Af hverju?

Hvar liggur fötlunin í því??  

Menntaskólinn á Ísafirði.

Ég er að fara á skólasetningu MÍ. Ég stefni á sjúkraliðanám og þarf að kanna hvort ég fái að hafa frjálsa mætingu. Ef það gengur þá er ég orðin skólastelpa. líklega aldursforsetinn, sem er sérlega þakklátt hlutverk hlýtur að vera en skólastelpa engu að síður. (eða til að ergja ekki feminískar vinkonur: nemandi)

Hvernig er þessu háttað hér í Bolungarvík?

Ætli kynjahlutföllin séu nokkuð jöfn? Væri mögulega hægt að nota þetta sem markaðsherferð vegna Ástarvikunnar hérna hjá okkur?

Þvílík snilld.

Ákall til ófríðra kvenna

Hinn eini sanni Tjarnarkvartett

varð til í Svarfaðardal, skipaður Diddu og Stjána, Rósu og Hjöra. Aðra Tjarnarkvartetta nenni ég ekki að hlusta á. Og þá er það klárt.

Við ætlum að fara á ættarmót inni í Reykjanesi á eftir. Það spáir reyndar rigningu en það er allt í lagi. Ég tíni þá bara fjallagrös á meðan gæjarnir hanga í lauginni. Það er stemmning í Víkinni í dag. Bylgjan að senda út dagskrána héðan, grískt matar og menningarkvöld í kvöld og ég veit ekki hvað og hvað.

Góða helgi.

Ást, hjörtu og rómantík

Ooooooo, þið sem vænið okkur ástarvikumanneskjur um væmni og allt það, þið eruð svooooo öfundsjúk! Gló, þú ert sko meira en velkomin hingað í ástarferð og ég skal taka vel á móti þér, kyssa og strjúka á alla lund!!

Við parið fórum í bíó í gær að sjá Mamma mia, ásamt heiðurshjónunum Ellu og Einari. Það var fullt í Ísafjarðarbíói og gaman að sjá fullt af fólki sem ég hef aldrei fyrr séð sækja bíó. Fullt af fallegum, og (vonandi) ástföngnum hjónum úr Ástarvíkinni, kenndri við bolung, mæðgur, systur, kærustupör.. og allir hlógu og skemmtu sér.  Mér þótti myndin sjálf heldur þunnur þrettándi en tónlistaratriðin fengu mig til að dilla mér í sætinu. Meryl Streep hefur alltaf verið í uppáhaldi hjá mér og líka þessi breski sem ég man ekki í augnablikinu hvað heitir, hann lék í Bridget Jones... anyone??? Hápunktur myndarinnar er þó vitanlega þegar hinn ofursvali James Bond leikari, Pierce Brosnan brestur í söng. Þar fór James Bond fyrir lítið! Ég grenjaði úr hlátri!

Nú ætlum við, ég og drengirnir mínir að klippa út pappírshjörtu til að líma í gluggana og grafa upp rauða seríu til að hengja upp. Kannski ég reyni að ná klukkutíma í berjamó áður en ég þarf svo að sækja Baldur í leikskólann. Þ.e.a.s. ef hann fæst til að fara. Hann vill bara vera áfram í sumarfríi. Lái honum það sko ekki!

Í kvöld verður svo kærleiksganga sem ég ætla að leiða. Bara svona dásamlegt, rólegt rölt um bæinn og kannski eins og ein heimsókn til hjóna sem hafa lengi verið í ástarsambandi. Svo verður opið í sundlauginni lengur en vanalega þannig að allir verða að taka með sér sundföt og fara svo að kela í heitapottinum! Mömmur, pabbar, ömmur, afar, börn og barnabörn, komið með mér út að ganga hönd í hönd. Og þeir sem koma einir, við hin knúsum ykkur ;)

Enn og aftur hneykslum við landann, bót í máli að stutt er í Ástarvikuna!!

Eins og hér má lesa halda bolvíkingar áfram að hneyksla landann......Púff, púff...... En bót í máli að nú fer ástarvikan góða að hefjast og til huggunar set ég inn dagskrá þessa dásemdaframtaks (og getiði nú hver á framtakið??) Sossu Vagns hér inn að neðan. Ég ætla að elska alla vikuna, eins og það komi enginn morgundagur ;)

Dagskrá Ástarviku 2008Sunnudagur 10. ágúst kl. 14:00 Flötin við ána.“Ég elska þig” - Opnun ástarviku.”Hundrað hjarta skógurinn” skapaður – ástarkveðjur til heimsins með blöðrum. Gasblöðrur seldar á staðnum. Allt á sínum stað.- Túnis, ég elska þig, - Japan, ég elska þig, - Jakúdía, ég elska þig…sendum út um allt! Veraldarvinir sýna magadans og leika og syngja á gítar. kl. 15:00 “Við elskum sætt”… Stelpukaffi á VaXon - servéttusýningMömmur, ömmur, dætur,systur, tengdasystur, frænkur, allar saman í kaffi. Spjallað og hlegið. Sevéttusýning. Allar konur eru hvattar til að koma með sértöku servétturnar (ekki pappírs) sínar til að sýna. Spennandi sýning sem verður til á staðnum. Kl. 17:00 Ráðhússalur. “Konan elskar og er elskuð… þannig lifir mannkynið “.Opnun myndlistarsýningar í Ráðhússal.Magdalena Margrét Kjartansdóttir myndlistarkona opnar listsýningu sína í Ráðhússalnum. Magdalena sýnir myndir af konum, konum, konum. ..Magdalena er ein fimm listakvenna sem eiga og reka listagalleríið START ART. Magdalena hefur unnið sem grafíklistamaður frá 1984 og fæst aðallega við tré – og dúkristur sem hún þrykkir á pappír. Sýningin er opin til laugardags. Mánudagur 11. ágúst Kl. 20:00 Kærleiksganga fyrir alla fjölskylduna.Kærleiksganga. Gengið verður frá Hundrað hjarta skógi. Sundlaugin og salsatónlist að göngu lokinni, -  mmm……huggulegt….Frítt í sund fyrir börn til 16 ára aldurs.    Þriðjudagur 12. ágústkl. 20:00 Kassagítarakvöld í Sprota – sal Tónlistarskólans. Allir sem kunna eitthvað smá á kassagítar koma með gítarinn sinn og við spilum saman falleg ástarlög, - gömul og ný. Oh… það er svo sætt að syngja um ástina… Miðvikudagur 13. ágústkl. 12:00 Svanur+ svanur = eilíf ást. Hádegisfyrirlestur í sal Náttúrugripasafnsins. Dr. Þorleifur Eiríksson forstöðumaður Náttúrustofu Vestfjarða segir okkur frá ástum svana í máli og myndum. Ljóð um svani lesin um leið og boðið er upp á bollasúpu. kl. 19:00 “Komdu nú með mér í kvöld út á sjó”…Kvöldsigling á Hesteyri. Sigling með sjótaxa Sigga Hjartar.Heimsókn í Læknishúsið á Hesteyri þar sem boðið er upp á Rabbabaragraut með rjóma og pönnukökur og kaffi.Rómantík inn í sólarlagið til baka!Verð kr.5.000.- pr. mann.Takmarkaður sætafjöldi. Miðapantanir í síma 892-3652. Fimmtudagur 14. ágústkl. 21:00 DÍSA - Tónleikar í Hólskirkju -DÍSAEin skærasta stjarna ungu kynslóðarinnar Bryndís Jakobsdóttir – Dísa ásamt gítarleikara Dísa sló eftirminnilega í gegn á “Aldrei fór ég suður” um páskana og því mikil tilhlökkun að sjá hana og heyra að nýju.Miðaverð kr. 1.500.-. Föstudagur 15. ágústGrískt kvöld á VaXon!Ótrúlega rómantísk, seiðandi grísk stemning.Matreiðslumeistari: Ingibjörg Ingadóttir sem elskar gríska matarmenningu og listir.Sérstakur gestur kvöldsins er Edda Björgvinsdóttir sem veltir fyrir sér umfjöllunarefninu ást og húmor! Stiginn verður grískur dans, grísk tónlist í loftinu…happdrætti í hverjum miða...Miðaverð: 3500. – pr. mann. Miðapantanir í síma 868-3040.  Laugardagur 16. ágústkl. 12:00 Pikknikk á teppi í Hundrað hjarta skógi.Allir koma með teppi, kakó, köku í boxi, gítar… hugguleg heit innan um eldrauð hjörtun í hundrað hjarta skógi. Allir mega lesa ástarljóð fyrir hina ef þeir vilja. Veraldarvinir sjá um andlitsmálun, leiki fyrir börnin og fleiri skemmtiatriði. Kl. 16:00 Prjónakaffi fyrir alla – konur og kalla. Stofnun prjónakaffis á VaXon. Koma með garnafganga og prjóna. Leiðbeinendur á staðnum. Kaffi og ástarpungar til sölu. Skemmtileg ástarlög við prjónaskapinn!Fjölskyldudiskó fram að kvöldmat! kl. 23:00 Je minn – það er BÍLABÍÓ!Hin óforbetranlega íslenska kvikmynd STELLA Í ORLOFI verður sýnd í tilefni af heimsókn Eddu Björgvinsdóttur í Ástarviku á íþróttahússvegnum. Popp og kók selt á staðnum.Miðaverð kr. 500.-  

Sumarmyndir

Er í óðaönn að henda inn myndum í "netmyndaalbúmið" okkar á Flickr!! Gjörið svo vel og lítið á. www.flickr.com/photos/ylfa

Hin aleina....

Drengirnir mínir eru allir með feðrum sínum í Reykjavík. Þannig að ég er ein heima. Mér finnst það eiginlega alveg ágætt. Morguninn hófst reyndar með að þrífa upp hundaskít úti um allt hús. Ég er að passa sveitatík sem er ekki að fatta þetta með úti/inni dæmið. Enda líklega ekkert vön að vera mikið inni. Ef eitthvað....

Síðan var brunað á Ísafjörð í viðtal á RÚV, sem verður að mig minnir flutt næsta föstudag klukkan hálffjögur á rás eitt, . Fjallar auðvitað um berjatínslu og nýtingu berja. Enda er ég sérlegur fræðingur í þeim efnum...

Morgunverðurinn samanstóð af kaffilatte í götumáli og hálfum banana sem ég sníkti hjá ömmu í hádeginu.  Ég var því að vonum svöng um sexleytið svo að ég labbaði í búðina og verslaði eftirfarandi: 1 box skurepulver (ekki samt til að borða) 100 grömm harðfiskur, ein hunangsmelóna, eitt langt, hvítt, nýbakað franskt baguette og eitt bréf af parmaskinku. Eitt stykki af lífrænu súkkulaði datt líka oní körfuna mína. (lífrænt súkkulaði er auðvitað rosalega hollt og alls ekki fitandi.) Á meðan ég slafraði í mig harðfiskinum með smjöri, las ég blöðin á netinu og hringdi svo í tengdamömmu til að leyfa henni að heyra mig borða hunangsmelónuna með baguettinu og parmaskinkunni. Hún var, eins og mig grunaði auðvitað, ekki búnað borða og slefaði gífurlega í símtólið á meðan ferskur, sætur melónusafinn rann niður hökuna á mér í hárréttu samræmi við saltbeiska skinkuna í örþunnum sneiðum..... DÁSAMLEGT!! Í eftirrétt fékk ég mér svo lífrænt súkkulaði, grænt te og tvær ferskar döðlur og mér finnst ég auðvitað vera heilög í gegn! Síðan fór ég í laaaangan göngutúr um alla Víkina að leita að sveitahundhelvítinu sem sleit sig laust úr keðjunni útiá meðan ég var að reyna að koma sláttuvélinni í gang. Heilagleikinn minnkaði auðvitað ekkert við það að því undanskildu að ég var staðráðin í að myrða helv... hundkvikindið þegar ég næði því. Skemmst er frá því að segja að leitin bar ekki árangur og við Urta mín þurfum líklega að fá okkur annan labbitúr á eftir.

Best að vaska bara upp þangað til.