Ársuppgjör án reikninga.

Loksins hef ég mig í að líta yfir árið 2oo8. Eins og sagði í bráðfyndnu áramótaskaupinu, -þetta var ömurlegt ár, -þá er ég að hluta til sammála því. En það sést týra í fallega ljósbletti inná milli. Fjárhagur heimilisins er tjah... bara í takt við fjárhag heimilanna um þessar mundir. Viðbjóður. Það er bara eitt orð yfir það, en það er nú ekki það versta sem hent getur. Ég lenti í hálfgerðu heilsutjóni og hef haft af því stærri áhyggjur en tittlingaskít eins og blankheitum.  Nú hef ég tekið þá ákvörðun að hunsa veikindi mín. Láta sem þau séu ekki til og sjá hvað gerist.

En það var margt sem við bar á árinu og hér ætla ég að gera á því stutta úttekt:

Aldurssjokk ársins: Elsti drengurinn fermdist. Mér fannst ég skyndilega öldruð og virðuleg.

Vonbrigði ársins hin fyrri: bæjarstjórnarklúðrið í Bolungarvík í vor. Of neyðarlegt til að gera því greinilegri skil hér.

Vonbrigði ársins hin síðari: velkist einhver í vafa? Ríkisstjórnin? Útrásarmenn? Bankahrunið?  Nenni ekki að fara yfir þá sögu heldur. Hún er einnig ákaflega pínleg og allir þekkja hana. En svarið er á góðri íslensku;  Yes.

Ferðalag ársins: Tjaldútilega í Kaldalóni með fjölskyldunni í hitabylgjunni í júlí. Sandur, skeljar, fjallalækir, hornsílaveiðar, pylsur og bakaðar baunir á prímus, uppvask í fjallalæk, hljóð himbrimans á lóninu um nótt, kvöldsól, rauður himinn, busl í heitum náttúrulaugum og rústir liðinna tíma, „þar sem norðursins fegurð ríkir ein ofar hverri kröfu.“

Gestir ársins:  Tenórarnir tveir, Eyfi og Jón Þorsteinsson ásamt Dr. Tótu. Hitabylgja sumarsins verður að teljast með gestum ársins. Klárlega. Jú, og Tengdamamma sem átti bestu meltingarfærabrandara ársins.

Breikþrú ársins: fölbleika greiphlaupið mitt sem seldist upp á markaðsdaginn.

Partý ársins: Haldið hér heima.  Mojito bladað í stórar könnur. Flestir gestir aðkomufólk sem söng mikið. Nokkrir heimamenn slæddust með, sér til undrunar og stemningsauka.  Endaði með sjúkrahúsvist og var gefið  magalyf í æð.

Og í framhaldi af því: Ákvörðun ársins:  að neyta ekki áfengis framar.

Blaðaviðtal ársins: pottþétt viðtal Hálfdáns Hálfdánssonar fyrrverandi fréttamanns á BB, við sultudrottninguna og húsmóðurina Ylfu Mist. Þar líkti hann hlátri mínum við skoppandi læk á kyrru sumarkvöldi sem gjálfrar silfurtær í móum... og hvaðeina. Minntist ég á það að hann er fyrrverandi blaðamaður??

Undrun ársins:  einkunnir haustannarinnar.  Sá að ég gat lært. Átti ekki von á því. Hef reyndar áttað mig á því núna síðustu daga að stærðfræðin er mér jafn erfið og fyrr.

Kyntröll ársins: Haraldur! Þarf að spyrja?

Fegurð ársins: Drengirnir mínir. Þarf að spyrja?

 

Og í lokin, svona af því að öllu gríni fylgir nokkur alvara; það sem hafði mestu varanlegu breytinguna á líf mitt eins og ég þekkti það var náttúrulega þegar hann elsku pabbi minn, Helgi Þorsteinsson Von Sauðlauksdalur, eins og ég kallaði hann alltaf, lést þann 25. Nóvember. Ég er ekki ennþá alveg búnað átta mig á þeirri breytingu að pabbi sé horfinn mér fyrir fullt og allt. Mér finnst ég alltaf ætla að hringja í hann, segja honum eitthvað næst þegar ég heyri í honum, sögu, brandara eða uppskrift, en þá man ég að hann er dáinn. Það er skrítið. En gangur lífsins engu að síður.

 

Athugasemdir

[Halla Signý Kristjánsdóttir, 20.1.2009 kl. 19:38]

Gleðilegt ár 2009 og takk fyrir árið 2008, frá fjelagskonu

[Harpa Hall (IP-tala skráð) 21.1.2009 kl. 23:09]

Elsku Ylfa ... gleðilegt árið skvís megi þetta nýja ár færa þér gleði, hlýju ( jú er ekki Haraldur með loðna bringu ) og góða heilsu ásamt fullt fullt af hlátri, hamingju.

Bestu kveðjur vestur

[Eyja (IP-tala skráð) 22.1.2009 kl. 18:24]

Glaðilegt ár Ylfa. Kom eitthvað út úr þessum veikindum hjá þér?

Kveðja Eyja