Þrumustuð.

Ef lífið væri alltaf svona!

Það var svooooo gaman í gær. Eftir langan og ljúfan brunch þrömmuðum við öll á markaðsdaginn hvar ég seldi allt mitt sultutöj á meðan ég brann upp til agna í sólinni. Svo var haldið heim í kótilettur í raspi og þvínæst skundað á tónleika með Túpílökum. Það var óborganlega skemmtilegt! Og partýið sem við héldum eftir tónleikana var líka óborganlega skemmtilegt. Og mikið drukkið af mojiitos. Og mikið borðað af nammi. Og í dag eru allir þunnir. Grafískar lýsingar ásamt myndum bíða því til mánudags-þriðjudags.

Vögguvísa Kúrekans og Lesbíusæðarinn.

Þá er vetrinum lokið og sólin farin að skína á ný.  Fallegur dagur í dag, sólríkur og yndislegur. Jarðarberja og vanillusultan kraumar í pottinum og fagurrauða tómatasalatið sem Eyfi útbjó í hádeginu hreiðrar vel um sig í meltingarfærunum. Allt ilmar af jarðarberjum og vanillu og tenórarnir Eyfi og Jón, ásamt Dr. Tótu syngja eins og lævirkjar allan liðlangan daginn. Á morgun verður farið á Hesteyri í Jökulfjörðum og í hádegisleikhús að sjá verk eftir Tótu sem sýnt er hér á Act Alone hátíðinni. Ég er búnað sjá það leikrit og það var auðvitað óborganlegt í flutningi Mörtu Sifjar Ólafsdóttur.

Á kvöldin sitjum við með kertaljós í stofunni, Eyfi saumar út, við Tóta litum vatnslitamyndir og Jón les upphátt úr ritinu "vögguvísa kúrekans," sem fest voru kaup á í Bónus í fyrradag.  Ritið fjallar um leggjalanga fegurðardís sem tekst á um forræði yfir stúlkukorni, við myndarlegan auðjöfur sem hefur hörkulegt augnaráð en viðkvæmnislegan munnsvip. Hún þrýstir brjóstunum gjarnan út í bikiníbrjóstahöldin og höfum við Tóta mikið æft okkur í brjóstaþrýstingi þessi kvöld með litlum árangri. Því miður. En ég skal leyfa ykkur að fylgjast með forræðisdeilu Chloe og Jake´s, ásamt því að rapporta um sultur og gönguferðir.

Sjálf erum við að semja okkar eigin ástarsögu, "Lesbíusæðarinn," heitir hún og fjallar um mann sem flekar lesbíska mágkonu sína.

Meira um það seinna.