Ylfa Mist Helgadóttir

26.2.2008 | 15:32

Dagar með vélbyssunef.

Það snörlar í nösum Baldurs þegar hann sýgur upp í horfyllt nefið. Mamma; -segir hann þá. Ég er með vélbyssunef! Hlustaðu bara!

Það koma alveg dagar sem draga úr manni allan mátt. Þessi er einn af þeim. Allir drengirnir veikir og féll í minn hlut að vera heima og gæta þeirra. Ekki það að sá elsti geti ekki passað, mér finnst bara dálítið langt gengið að láta veika drenginn minn passa hina veiku drengina :) Og ég kem engu í verk. Engu. Og það er ekki það að ég viti ekki hvar ég eigi að byrja. Það skiptir engu hvar ég byrja, allsstaðar er þörf fyrir tiltekt og þrif. Svo að ég tali nú ekki um allan páskabaksturinn sem bíður... glætan!!!

Í dag hef ég akkúrat EKKERT gert, nema hangið í tölvunni og étið. Það var svo mikið afrek fyrir mig að labba eina ferð í þvottahúsið og hengja úr vél að ég varð að verðlauna mig með nammi á eftir. Nú sit ég og ét það nammi og mér finnst það ekki einu sinni gott. Bragðast eins og saltaður appelsínubörkur sem hefur verið dýft í sykurlög. Ógeðslegt. En ég gefst ekki upp og klára úr pokanum eins og þæg stúlka. Svei mér ef ég verð ekki að skreppa í sundlaugina á eftir og synda af mér Haribo pokann. Nema að ég leggi mig og síkreti af mér s.s. tíu kíló á meðan.... kannski alveg jafn vænlegt?

Börnin horfa á Simpson og ég stari á fólk út um gluggan og hugsa: hvaðan kemur öll þessi orka? Mér finnst allir alltaf vera að gera eitthvað. Sjálf hef ég varla orku til að blikka augunum! Hvernig stendur eiginlega á þessu?

Jæja, Upp með þig Ylfa Mist. Á fætur og komdu einhverju í verk! Einn.... tveir..... ognú!

Flokkur: Bloggar | Facebook

Athugasemdir

Stundum á maður bara að leyfa sér að vera "orkulaus", slaka á og safna kröftum Það er nú bara þannig með flesta að orkan er ekki endalaus! Þannig að Ylfa mín, bara taka þá ákvörðun að þessi dagur sé til að safna ORKU, þá verður morgundagurinn betri

Knús frá einni sem er lögst í veikindi

Ragnheiður Ása Ingvarsdóttir, 26.2.2008 kl. 17:40

Eina skýringin sem mér dettur í hug (og þú vilt örugglega ekki heyra) er sú staðreynd, að nammi er orkusuga, en ekki orkugjafi.

Svo er auðvitað ekki sérlega orkugefandi að vera heima hjá veikum börnum og hugsa um allt það sem mann langar að gera, þyrfti að gera og ætti að vera að gera, en er ekki að gera.

Laufey B Waage, 26.2.2008 kl. 18:58

Hef ekki komist í tölvu lengi,var að lesa um lödufyrirboðann,góður guð pissaði næstum því á mig....segji það og skrifa þú ert heinn snillingur Ylfa.Takk fyrir skemmtileg skrif mbk Birna

Birna (IP-tala skráð) 26.2.2008 kl. 21:41