Sullaveikin

Um það bil fimm tímum eftir síðustu færslu, vaknaði húsfreyja af værum blundi með þá verstu magaverki sem þekkst hafa. A.m.k í þessu húsi. Þeir ágerðust og hörðnuðu þangað til bóndi sá sér þann kost vænstan að hringja út unga lækninn sem valdið hefur kurri meðal ólofaðra meyja hér í plássinu sökum fríðleika síns. Ungi pilturinn, sem er hreint afbragðs læknir, spýtti morfíni í grenjandi húsfreyjuna og hringdi á sjúkrabíl. Á spítalanum tók við annar læknir og varð húsfreyju á að hvísla að unglækninum úr Víkinni; hann er pottþétt ennþá yngri en þú!Síðan varð allt krökkt af læknum og hvítum sloppum og einhver aumkvaði sig yfir húsfreyju og sendi hana í algleymisdá verkra sterkjarlyfja sem varaði þangað til nú í morgun. Og viti menn. Á meðan hugur húsfreyju synti í sýrukenndum hugsunum, gerðu menn á henni hin ýmsu test og myndatökur. Og upp úr krafsinu kom sennilegasta útskýringin; magabólgur. Og þá mátti húsfreyja fara heim. Og hér heldur hún áfram að sofa af sér sólina og blíðuna. En er nú heldur að hressast. Sjálf er húsfreyja nokkuð viss um að hana hrjái gamall og góður sullur! Enda ótækt að því hressandi sníkjudýri hafi verið eytt úr íslendingum. Drastískar lýsingar á sullaveikum einstaklingum í fornum bókum hafa alla tíð verið húsfreyju mikil skemmtan og því sjálfsagt að halda goðsögn ormsins við og heiðri hans á lofti! :) 

Það versta var að ég missti af síðasta sólarhringum með gestunum mínum dásamlegu. Við ætluðum í Reykjanes að svamla í lauginni og borða nesti, og keyra svo heim í kvöldsólinni í gærkveldi og syngja íslensk sumarljóð. En ekkert varð úr því. Hins vegar sýnist mér þau hafa verið upptekin við að þrífa vanhirt svæði hússins, s.s. búrið, í minni fjarveru. Ég sakna þeirra strax. Vona að þau komi fljótt aftur.

 

Athugasemdir

[Auður (IP-tala skráð) 8.7.2008 kl. 20:49]

 Takk fyrir síðast!

Leitt að heyra :(, mér finnst nú líklegra að 15 kíló af súkkulaði frá frændanum og mohito í lítratali hafi haft eitthvað að segja ;) nei svona er ljótt að segja enda fleiri sem nutu veitinganna. Láttu þér batna væna.

kv. Auður

[reykvíkinga á Ísafirði (IP-tala skráð) 8.7.2008 kl. 21:01]

Æi hvað þetta var leiðinlegt. En gott að hafa góða lækna nálægt. Láttu þér batna.

[Katrín, 8.7.2008 kl. 21:58]

Ertu viss um að þetta sé sullur? Mér finnst iðraveiki skemmtilegra heiti

Kveðjur frá maga- höfuðverkjasjúklingnum í efra 

[alva (IP-tala skráð) 8.7.2008 kl. 22:01]

Æ, ég vona að þetta fari að skána hjá þér vestfiska mær.

[Steinunn Helga Sigurðardóttir, 9.7.2008 kl. 07:08]

ææ ekki gott að heyra, en þú varst þó þeirrar ánægju njótandi að fá svona sætan lækni !!!

knús

steina 

[Sigga Lára (IP-tala skráð) 9.7.2008 kl. 09:17]

Sullurinn getur nú leyst ýmsan vanda. Til dæmis þarftu þá ekki að hafa nokkrar áhyggjur af að þessi 15 kíló af súkkulaði verði þér til vaxtarbreytingar.

En magabólgur ku vera leiðindakvilli en kannske eitt og annað matreiðslukennkyns sem er hægt að gera við þeim. (Semsagt, éta eingöngu fáránlega hollvondan mat. Ég veit. Ömó.) Og fara í stólpípu til Póllands. Það ku virka á flesta magakvilla. Örugglega líka kornungir læknar þar.

[Ylfa Mist Helgadóttir, 9.7.2008 kl. 14:02]

Held þú hafir hitt naglann á höfuðið Auður. Mojiito og bland í poka með dassi af snakki er ekki góð blanda fyrir magavesalinga. Ósanngjarnt þó að Halli hafi ekki fengið í magann þar sem hann í restina af partýinu úðaði í sig þrem kílóum af sælgæti eftir að hafa étið úr þremur snakkpokum. En hann er með góðan maga hann Halli. En áfengi á ég líklega að forðast, og það vissi ég svoesem. Allavega veit ég það núna

Siggalára: Auðvitað á hver heilbrigð manneskja sem er annt um vaxtarlagið að koma sér upp sullaveiki. Aukakílóin úr sögunni! Ég fékk nú bara mína stólpípu á FSÍ. Hjá kornungum læknum ;o)

[Ragnheiður Ása Ingvarsdóttir, 9.7.2008 kl. 16:41]

Ææææ, gott þú skulir vera að hressast!

Vissi ekki að læknarnir væru farnir að gefa stólpípurnar........

Þú hefur fengið einhverja spes þjónustu   ;-#

[Katrín Dröfn Markúsdóttir, 9.7.2008 kl. 17:29]

Sæl essskan

Takk fyrir síðast og takk fyrir mig ... snakkið og nammið fór ekki illa í mig og heldur ekki hið stórgóða mohito.  Láttu þér batna og farðu vel með þig .... læknar sem gefa stólpípu!!! þú hefur fengið einhverja sér meðferð bara ;)  

[Guja (IP-tala skráð) 9.7.2008 kl. 23:17]

Hjartað mitt láttu þér batna, sólin á eftir að vera hér út sumarið

[valrun (IP-tala skráð) 10.7.2008 kl. 07:45]

ÆÆÆ hvað er að heyra...leiðinlegur endir á annars æðislegri helgi þarna hjá ykkur, að því er virðist.  En nú er bara að sleppa snakki , nammi, og mojhitos í einhvern tíma og taka bara Nexium og borða baunir og kálið úr garðinum.

Láttu þér batna, koss og knús á línuna..líka til gelgjunnar...

[Ragnheiður Ása Ingvarsdóttir, 10.7.2008 kl. 19:16]

Til hamingju með rauðvínspottinn!  Ætli það sé gott í sullaveikismaga?