Skutull rauður, BB blár?

Tveir stórir fréttavefir eru starfræktir í Ísafjarðarbæ, annars vegar www.bb.is og hins vegar www.skutull.is. Annar vefurinn, þ.e.a.s. Skutull, er "málgagn" ákveðinna pólitískra afla og hefur aldrei reynt að fara í grafgötur með annað. Svo auðvitað bara ræður fólk hvort það kærir sig um að lesa þann vef eður ei. BB auglýsir sig aftur á móti sem "frjálsan og óháðan" miðil. Undanfarin misseri hefur mér þó fundið að sá ágæti fréttavefur hafi sinn bláa front af ástæðu sem hljóti að teljast pólitísk. Þessi grein hér rennir einmitt enn frekari stoðum undir þennan grun minn. Ég skil alls ekki svona blaðamennsku. Með fullri virðingu fyrir hinum mæta manni, Eiríki Finni Greipssyni, sem vissulega hefur fullt skoðanaleyfi og er, eins og ég þekki hann, bæði gegn og mætur maður, þá undrar það mig stórum hvers vegna í veröldinni það skiptir máli hvað honum finnst um þetta mótframboð??

Hvers vegna er ekki bara talað við frambjóðanda Kammónistanna sem um ræðir? Gunnar Atla? Af hverju þurfum við að vita hvort Eiríkur Finnur hefur athugasemdir varðandi framboðið? Af hverju er Albertína hjá Framsókn ekki spurð? Eða einhver af Í-listanum?

Bæjarins besta er ágætis blað. Og ágætur vefur. Ég skoða hann oft. Það er svo sem engin bein "fréttamennska" í gangi þar. Meira svona "hvað er að frétta" mennska. Ef þið skiljið hvað ég á við. Ekkert verið að kryfja málin eða neitt slíkt. Allir geta sent inn greinar og er það vel. En það er auðvitað athyglisvert þegar td. bæjarstjóri Bolungarvíkur fær stórt opnuviðtal stuttu fyrir kosningar og fyrirsögninni "rúmlega 300 milljóna króna viðsnúningu í Bolungarvík." er forsíðuuppslátturinn!

Ég bjóst auðvitað við því, -eins og aðrir að næst yrði þá talað við Soffíu Vagnsdóttur eða einhvern úr minnihluta bæjarstjórnar Bolungarvíkur, svo að janfræðis væri gætt fyrst BB var á annað borð að gefa Elíasi Jónatanssyni þetta fína færi á að auglýsa þennan viðsnúning svona kortér í kosningar, en nei. Því er ekki að heilsa. Ekki enn a.m.k.

 Ritstýring Bæjarins besta er að mínu mati heeeeelblá. Sem væri í allra besta lagi EF þeir gæfu sig hreinskilnislega út fyrir það. "frjálst og óháð" finnst mér engan vegin eiga við í sambandi við BB. Blái litur forsíðunnar er afskaplega viðeigandi. En að yfirskriftin sé "frjálst og óháð" blað, -finnst mér ekki jafn viðeigandi.

 

og í þriðja sæti....

Bæjarmálafélag Bolungarvíkur, óháð og lýðræðisleg stjórnmálahreyfing íbúa í Bolungarvík samþykkti á almennum félagsfundi þann 4. maí 2010 s.l. framboðslista fyrir komandi sveitarstjórnarkosningar að undangenginni skoðanakönnun á meðal bæjarbúa sem fór fram daganna 28.4 og 2.5. 2010. Framboðslisti Bæjarmálafélagsins er eftirfarandi: 

1. Ketill Elíasson.   Fiskeldisfræðingur Traðarstíg 1,  415 Bolungarvík
2. Jóhann Hannibalsson.  Bæjarfulltrúi/bóndi Hanhóli, 415 Bolungarvík
3. Ylfa Mist Helgadóttir.   Aðhlynning aldraðra Vitastíg 12,  415 Bolungarvík
4. Arnþór Jónsson.    Véltæknifræðingur Geirastöðum, 415 Bolungarvík
5. Sigríður Hulda Guðbjörnsdóttir.  Tölvunarfræðinemi Bakkastíg 6a 415 Bolungarvík
6. Kristún Hermannsdóttir.   Húsmóðir/sjúkraþjálfari Grundarhóli 1,  415 Bolungarvík
7. Roelof Smelt.    Tölvunarfræðingur Þjóðólfsvegi 9, 415 Bolungarvík
8. Birna Hjaltalín Pálmadóttir.  Æskulýðsfulltrúi Þjóðólfsvegi 9, 415 Bolungarvík
9. Lárus Benediktsson.   Verkamaður/form.VSB Holtabrún 17,  415 Bolungarvík
10. Gunnar Sigurðsson.   Skrifstofustjóri  Hólsvegi 6,  415 Bolungarvík
11. Matthildur Guðmundsdóttir.  Bankastarfsmaður Hólsvegi 7,  415 Bolungarvík
12. Sigurður Guðmundur Sverrisson. Vegavinnuflokkstjóri Hlíðarstræti 22, 415 Bolungarvík
13. Elías Ketilsson.   Útgerðarmaður  Þjóðólfsvegi 3,  415 Bolungarvík
14. Birna Hjaltalín Pálsdóttir.  Húsmóðir  Þjóðólfsvegi 5,  415 Bolungarvík

1. maí og við drögum upp í heila stöng.

Fyrir mér er 1. maí einn hátíðlegasti dagur ársins. Alveg frá því að ég var smákorn hef ég vitað hversu gríðarlega þýðingu þessi baráttudagur hefur fært fólki. Og það var jafnvel áður en ég fór að lesa mér til um baráttu verkalýðsins um heim allan fyrir bættum kjörum. Baráttu sem síðan snérist sumstaðar uppí andhverfu sína vegna valdagræðgi, spillingar og þjóðlægrar heiftar. Kommúnisminn var fögur hugsjón líkt og frjálshyggjan er fögur hugsjón. En einhversstaðar í ferlinu missa menn sjónar á takmarkinu, hugsjóninni, og sökkva í fen mannfyrirlitningar, valdahroka, ofbeldis og fégræðgi. Kommúnisminn breyttist í skrímsli, byltingu sem át börn sín og frjálshyggjan hefur alla tíð alið af sér önnur skímsli. Ófreskjur sem fótumtroða réttindi allra til mannsæmandi lífs.

Allt sem til er í heiminum er til í mér.

Þetta þarf ég að sætta mig við. við öll.  Það er erfitt. Erfitt að trúa því að við manneskjurnar séum í raun eins í grunninn. Síðan mótast hver og ein okkar af umhverfi okkar, aðbúnaði, leiðsögn og tíðaranda. En í okkur öllum býr allt það sama. Í öllum býr kærleikur, grimmd, ást, vonska, baráttuvilji, uppgjöf, reiði, gleði.... Svo fer það eftir lífsláni okkar hvaða kraftur verður ríkjandi. En öll erum við fær um það sama. Og öll erum við jöfn fyrir Guði. Sem í mismunandi útfærslum okkar, í þeim misjafna skilningi sem við í hann leggjum, samt hinn sami. Þegar okkur tekst að skilja þetta til fullnustu, ekki bara færa þessar hugsanir í orð, heldur virkilega skilja þær, þá verður mannkyninu borgið. ´

Og það mun gerast! Gleðilega hátið.