Að taka á móti gestum er góð skemmtun. En þá er gaman að hafa fínt hjá sér....

Það er gott að búa í Kópavogi, segir Gunnar Birgisson. Ég tel þó, að betra sé að búa í Bolungarvík. Að flestu leyti. Bolvíkingum þykir vænt um bæinn sinn og þola illa gagnrýni á hann. þeim sjálfum leyfist að gagnrýna hann, en aðeins upp að vissu marki. Auðvitað má svona "aðkomulið" eins og ég ekki hafa nema takmarkaðar skoðanir á hlutunum. Mér má ekki þykja þráalykt af pólitíkinni hérna, mér má ekki þykja farið að súrna í ýmsum gömlum hefðum sem haldið er í.... hefðanna vegna, og þar fram eftir götum. Ég skil það alveg. Sjálf er ég smábæjarbúi að upplagi og man vel hversu mikið hið "glögga gestsauga" gat fírað upp í mínu eldfima geði á Dalvíkinni draumabláu. Það var ekki fyrr en ég hleypti heimdraganum og skoðaði í kringum mig, sem ég sá hlutina í sama ljósi og "gestsaugað."En hér verð ég líklega að sætta mig við að vera "aðkomumanneskja" svo lengi sem ég bý hér. Og það er allt í lagi. Á meðan get ég a.m.k haft skoðanir á Víkinni án þess að vera að bryðja vinnulúin bein genginna forfeðra sem "gáfu allt sitt til að byggja upp samfélagið" og "gefa skít í átthagana." Ég hef jafnvel þurft að sitja undir hnútuköstum fólks sem hefur búið annars staðar meiri part lífsins en er "miklu meiri Bolvíkingar" en nokkurntíma ég. Og það þó svo að ég búi þó hér, en það geti ekki hugsað sér það!En héðan hleypti heimdraganum maður. Hann snéri tilbaka eftir 20 ára fjarveru, mikill og merkilegur tónlistarmaður og alveg ótrúlegur happafengur fyrir bæinn. Hvort bæjarbúar kunna að meta það er svo annar handleggur. Hann hefur búið erlendis lengi og ferðast grimmt. Og eins og flestir Íslendingar virðast gera sér grein fyrir í dag, sér hann mikla möguleika á ferðtengdum iðnaði á fallega landinu okkar. En.... hann gerir sér líka grein fyrir því að til þess að verða ákjósanlegur staður fyrir ferðamenn, þarf bærinn að geta státað af einhverju öðru en fjöllum og sjó. Því að það er nóg til af slíku annarsstaðar á Íslandi.

Vissulega er fallegt í Bolungarvík. Og bæjarstæðið er mikilfenglegt! Um það efast enginn. En hér er líka geysilegt drasl! Fyrirtækjum og einstaklingum virðist vera fyllilega frjálst að safna ryðhræjum, plastdrasli og rusli af öllum sortum í kringum sig án nokkurra afskipta. En ég fékk aftur á móti bréf frá bæjarstjóranum í  vikunni sem leið þar sem meðal annars stóð, að mér sem hundaeiganda væri gert skylt að þrífa upp skítinn eftir hund minn á MINNI EIGIN LÓÐ, sem og annars staðar! How ironic is that?? ´

En á meðan fýkur plastið, draslið og ruslið á víð og dreif innan um gömul vélarhræ, ryðhrúgur af óþekktum uppruna og annað drasl og fangar auga hvers þess sem heimsækir bæinn. Bolvíkingurinn víðförli ákvað að ýta aðeins við okkur, samborgurum sínum, gekk í um klukkustund eða svo og tók myndir. Hann stillti engu upp, leitaði að engu sérstöku. Tók bara myndir af því sem fyrir augu bar. Nema hann sleppti fjallstoppunum og sólarlaginu sem við erum svo stolt af!  Hann gerði síðan úr þessum myndum plakat með tilvitnun í hinn virta túristabækling Lonely Planet, sem er að ég held mest seldi upplýsingamiðill fyrir túrista í heimi. Þar er fjallað um Bolungarvík sem druslulegan smábæ sem lítið hafi að bjóða nema tvö söfn og ofgnótt af rusli.

Sjálf hef ég alltaf keypt mér Lonely Planet bækurnar þegar ég hef farið erlendis og tekið á þeim fullt mark, þar sem þær eru ýtarlegar og upplýsingarnar hafa aldrei klikkað. Því geri ég fastlega ráð fyrir því að aðrir sem þær kaupa treysti þeim sem nýju neti.  Þegar ég sá þessi plaköt, hugsaði ég strax; ÓMÆGOD! Er þetta svona hræðilegt í alvörunni?? Úff! Og þvínæst; ég fer sko pottþétt með poka með mér í göngutúr næst og tíni rusl sem á vegi mínum verður! Mér fannst þetta frábær áminning. Og ég var voðalega fegin að hún kom frá „Bolvíkingi“ en ekki einhverjum „aðkomu“ eins og mér! J

En hvað gerðist? Plakatið var RIFIÐ NIÐUR! Og það sést ekki lengur neins staðar. Af öskureiðum Bolvíkingum sem fannst þetta argasti dónaskapur og hið versta níð um ástkæra bæinn! -Þvílíkur brandari, að halda að með því að neita að horfast í augu við hlutina þá séu þeir ekki lengur til!? Hvað gekk þessum ágætu mönnum, -og eða konum, til með að losa sig við sönnunargögnin? Heldur fólk að ef að ekki eru til myndir af draslinu þá sjái það enginn?

Mér finnst þetta skrítið.  Og ég skil þetta ekki heldur.

En ég veit það, að ef þessi endastöð sem Bolungarvík er, ætlar að gera það ákjósanlegan kost fyrir ferðamenn að sækja sig heim, þá þarf að taka til. Hér eru mörg snyrtileg og falleg hús og ótrúlega fallegir garðar miðað við veðráttu og harðbýli fyrir gróður. En ferðamenn sjá þetta ekki. Þeir skoða höfnina, aðalgötuna. Hvað blasir við þar? kíkja kannski í sundlaugina sem státar af nýrri og skemmtilegri rennibraut og fallegu útigólfi. Annað er orðið frekar slappt. Tjaldstæðið? Er það sambærilegt öðrum tjaldstæðum á landinu hvað þjónustu varðar?  Jú, við höfum Náttúrugripasafnið og Ósvör. En það dugar ekki eitt og sér.

Auðvitað rær bæjarfélagið lífróður, skítblankt og allt það. En þarna getum við fundið peninga. Í ferðamönnunum. En þá verðum við líka að hafa eitthvað að bjóða. Og snyrtilegt bæjarumhverfi kostar ekki mikla peninga. Vinnu og skipulag, já.  Og nú spyrð þú þig kannski ágæti lesandi; og hvað ætlar þú, Ylfa Mist, sem ert svona dugleg að munda pennann að gera? Ha? Svarið er; ég ætla að reyna að hafa umhverfið mitt snyrtilegt. (þó að Guð einn viti að í þeim efnum komist ég aldrei með tærnar þar sem nágrannakonur mína hafa hælana, með alla mína ómegð og hunda!) Þegar vorverkunum lýkur, og hretin eru afstaðin vonast ég til að ég geti horft á þá sem framhjá húsinu mínu ganga, án kinnroða og skömmustutilfinningar, og sagt, hér bý ég!

Og vonandi getum við allir Bolvíkingar, innfæddir og aðkomu, tekið stoltir á móti ferðamönnunum okkar í sumar og sagt, án kinnroða eða skömmustutilfinningar; þetta er fallegi bærinn minn.

Athugasemdir

[Aprílrós, 25.5.2009 kl. 08:31]

Knús ;)

[Þuríður (IP-tala skráð) 25.5.2009 kl. 10:52]

Sæl Ylfa Mist.

 Þetta er góður pistill hjá þér og vona ég að sem flestir lesi hann og geri eitthvað í sínum málum, hvort sem það er í Bolungarvík eða annars staðar. Sjálf er ég "innflytjandi" í lítið sjávarþorp og hjá mér er nákvæmlega sama sagan og hjá þér.   Tökum til svo við getum verið stolt af heimabænum okkar.

Takk fyrir skemmtileg blogg.

Kv.Þuríður 

[María Guðbjörg Jóhannsdóttir (IP-tala skráð) 25.5.2009 kl. 12:24]

Frábær færsla.

Mér fannst þetta plakat alveg geggjað, í alla staði, þegar ég sá það og að það hafi verið rifið niður þýðir að það hafi haft áhrif. Þó sannleikurinn sé ekki alltaf skemmtilegur er hann stundum nauðsynlegur og eigum við að hvetja vitundarvakninguna en ekki letja.  

Það má svo alltaf prenta út fleiri eintök. Um að gera að halda áfram að minna fólk á umhverfið/heimilið sitt. Það hefur áhrif á endanum!

[Katrín, 27.5.2009 kl. 01:00]

Skodinn pistill Ylfa´.  Auðvita eiga menn að akta sig á þennan hátt, taka draslið fyrir og mynda það..það verður örugglega ekki þverfótað fyrir túrhestum sem vilja kíkja á draslið. 

SKil þó ekkert í þessum heimfræga tónlistamanni að hafa ekki tekið eftir draslinu fyrr....gæti þó reyndar tengst því að að þegar Garðar Hólm Bolungarvíkur kom heim voru aðrir við völd....og mannurinn fengið einhverja glýju í augun.   Batnandi mönnum er best að lifa...upp með draslið í bakgörðum....annarra því  Garðar Hólm var jú gull í gegn....

[Steinunn Helga Sigurðardóttir, 27.5.2009 kl. 14:41]

elsku frænka, mjög áhugavert. ég hef líka alltaf hrifist af bolungavík, fyrir þá náttúrufegurð sem bærinn er í. þegar ég kom síðast sem var fyrir rúmu ár gekk ég um bæinn og tók myndir. fullt af flottum myndum af ljótum húsum og drasli. Sem myndefni fannst mér þetta spennandi og flott, því ég upplifði bæinn sem hálfgerðan draugabæ í mikilli niðurníðslu. en sem myndlistamaður var myndefnið flott.

gangi ykkur vel að taka til. það gti líka verið hugmynd að auglýsa bæinn sem ruslabæinn á hjaranum :o)

[María Guðbjörg Jóhannsdóttir (IP-tala skráð) 27.5.2009 kl. 22:05]

Sko þetta hafði áhrif. FRÁBÆRT!

Það þarf ekki marga til að breyta hlutunum. Gott mál! Bæði hjá þér og höfundi plakatsins

Kveðja

[Ylfa Mist Helgadóttir, 28.5.2009 kl. 04:07]

Jahérna Kata. Ekki hafði mér dottið í hug að færa þetta í pólitíska kjólinn. Um hvaða heimsfræga tónlistarmann ert þú að tala? Mikill og merkilegur tónlistarmaður sagði ég. (efa það að nokkur maður eigi bágt með að taka undir það með mér)Heimsfrægur? Það held ég ekki :-) En það getur auðvitað verið, án minnar vitneskju.

[Katrín, 28.5.2009 kl. 09:17]

Don´t try to fool me.....söng maðurinn um árið

[Ylfa Mist Helgadóttir, 28.5.2009 kl. 17:02]

Wouldn´t bother, Love.